Zokam Standard Version (ZSV)

Zokam Standard Version (ZSV)

 * for     ProPresenter

              Free Show

              Open LP

              VideoPsalm

ZSV Laisiangtho thu,

Lai Siangtho a Huampi a Etna

1.Lai Siangtho in tangthu paipi khat hong gen hi. Tua tangthu saupi hi a, khat veivei tel ding haksa thei hi. Ahih hangin tangthu khat bek ahi hi.

Pasian in ama min a kipahtawi theih nadingin, Lai Siangtho sungah ama nasepte hong gen hi. Pasian in mawhna sunga a puk a piansakte tankhia ahih manin, amah tawh a kilawm pahtawina ngah hi. Ama nasepte sungah phawk ding a thupi li om hi.

1) Piansakna: Pasian in Leitung piangsak a, a uk dingin mihing bawl hi.

2) Pukna: Adam le Pasian bawlsate mawhna sungah puk uh hi.

3) Tatkhiatna: Pasian in Abraham suan, ama Tapa tung tawnin hih leitung tankhia hi.

4) Vangliatna: Pasian in hihte khempeuh ama minthan nading in a sem ahi hi.

A huampi a etna pen tomkim in, a neng a tawngin huamkim zo lo hi. Ahih hangin a theihhuai khempeuh i tel nadingin hong huh hi. Gentehna in Jonah, Jephthah le Jehu-te tangthu bang Lai Siangtho buppi tawh i et kak ciangin a deihna kitel zo pan hi.

A masa thu thumte a huamin en ni. Hih thu thumte in a thu lina kawk ciat uh hi.

1) Piansakna

Pasian piansakte a cilin “hoih mahmah hi” (Pian 1). Amah in mi masa Adam le Eve, ama lim le mel sunin bawl a, a pung ding le leitung a uk dingin thupha pia hi (Pian 1:26-28). Ahih hangin tua thuphate pen nasep lianpi khat hi a, a kipiangsak na khempeuh tungah Pasian tangmi hong suak uh hi. Amaute in Pasian bawlsa leitung Pasian uk ding bangin a uk uh ciangin, Pasian tangmi hoih hong suak uh hi.

2) Pukna

Ahih hangin Adam le Eve mawhna sungah hong puk uh hi. Amaute in gulpi khemna um kha uh hi (Pian 3). Lai Siangtho in “muat theihna sila” a cih hamsiatna nuai ah (Rom 8:21) amau uk leitung le amaute mahmah hong tun uh hi. Pasian ukna sungah om ding sangin, amau thu in uk ding hong hanciam uh hi. Hih thu hangin leitung mi khempeuh in a suah phetun langpanna lungsim nei uh hi. Ganhingte nangawn in gentheihna thuakin si uh hi. Amaute in that uh hi. A kipiangsak nate Pasian pahtawi veve uh a, ahi zongin tau uh hi. Amau a kitat ding ngak uh hi. Pasian gelnasa a batkik nadingin amaute in ngak uh hi.

3) Tatkhiatna

A sawt loin Pasian in tatkhiat nading nasep hong kipan pah hi. Pasian in Adam le Eve tungah “numei khaici” in ni khat ni ciangin gulpi lutang suzan ding hi, ci in kamciam hi (Pian 3:15). Leitung tangthu ah a dahhuai pen ni mahin Pasian in lungdamna thu hong pia hi. Amah in Adam suksiatsate lemtuah ding hi.

Kum tampi khit ciangin Pasian in milim a bia Abraham hong teel a, leitung a tatkhiatna ah amah a zat nadingin a kamciam hi. Pasian in Adam tungah a kamciam khaici pen Abraham tungtawn in hong piang ding hi, ci in gen hi. Abraham ahih leh innkuan lianpi khat suak ding a, amaute in amau leitang ding ngah ding uh hi (Pian 12, 15, 17).

Abraham innkuan pen Israel minam hong suak hi. Hih innkuan khat tawh Pasian in a tuam vilvelin thuciamna bawl hi. Amaute in Adam sep zawh loh nasep ahi, leitung minam khempeuh tungah Pasian tangmi a hi dingin Pasian in a teel ahi hi (Pai 19:5-6).

Pasian bangin amaute a siantho theih nadingun (Pai 20), Pasian in kamsangpa Moses tungtawnin amaute thukham pia hi. A siangtho Pasian in amaute mawhna a lipkhap mahmahna thu a theih nadingun (Siampi Laibu), gangawh biakpiakna a piak ding uh hilh hi.

Ahih hangin Pasian teelsa Israel mite ahih leh, mawhna sungah kibual tawntung uh hi. Amaute sungah Adam mawhna thuk lut lua ahih manin, Pasian a it ding zah un it zo lo uh a, ama thu a man ding zah un mang zo lo uh hi. A kamsangte, a siampite le a kumpite in zong amaute kisapna cin zo lo uh hi. Amaute kisapna a pia zo ding mi khat kisam lai uh hi.

Pasian in amaute kisapna a pia ding mi khat a piak nadingin kamciam hi. Amau kumpite lakah kumpi hoih, David suan sung panin Israel kumpi tokhom tungah a tu tawntung ding khat kong piang ding ci hi, David tungah Pasian in gen hi (2Sa 7). Israel mite in mawhna a bawl nawn loh nadingun, Pasian in amaute lungtang tungah ama thukham a gelh nading thu, a kamsang lianpente laka khat ahi Jeremiah kiangah gen hi (Jer 31).

Thuciam Lui i sim ciangin, bangci bangin Pasian in hihte sem ding ahi hiam? Bangci bangin Lai Siangtho tangthu tawp ding ahi hiam? cih dotnate hong ngaihsunsak hi.

Thuciam Thak

Thuciam Thak pen dawnna ahi Zeisu Khazih tawh kipan hi. Israel makai khempeuh le mi khempeuh in a tangtun zawh loh uh thu Zeisu in tang tun hi. Pasian Tapa mi hong suak a, mawhnei loin nungta hi. Leitung mite mawhna tang dingin si a, sihna pan thokik hi (Rom 4:25). Hun thak khat le ukna thak khat hong pan khia hi. Ni khat ni ciangin a pa David tokhom tungah tu ding hi (Lat 2, 110).

Vantung ah a kahtoh khit ciangin, ama nungzuite in pawlpi a kici Israel a hi lo pumpi thak khat a phuhna uhah thu a hilh ding le tha a pia ding Zeisu Khazih in a Kha hong sawl hi (Joh 16:1-15; Saw 2). Pasian in Judah mite le Gentile mite tungah ama ukna a kizelh nadingin pawlpi hong zang hi. Pawlpi mite amau omna ciatah a kikaihkhop uh ciangin biakpiakna pia uh a, kikholhkhopna nuamsa in, thungen uh a, Topa ankuang umkhawm in, Pasian thute sin uh hi (Heb 12:28-29; Saw 2:42). Thuciam Thak in Pasian mite tungah Khazih nasepte gen a, tua in Lai Siangtho tangthu ahi piansakna, pukna le tatkhiatna cihte a tangtunna ahi hi.

Leitung ah mihingte kizel in, luah ding uh a, uk ding uh hi cih ama kamciamte Pasian in tangtungsak pelmawh ding hi. Ahi zongin mi tampite in tuate a sem dingin hong sawl Pasian bia lo uh ahih manin, thu umte nasep thak khat hong nei uh hi (Mat 28:18-20). Eite in thu um lo mite tungah Khazih mawhmaisakna thu i tangko ding kisam hi. Mite kisik in Zeisu hong sawl khempeuh a sep nadingun eite in i hilh pelmawh ding ahi hi.

Mailam Thu

Zeisu in leitung a uk ni ding le sihna a om nawn loh ni ding pen pawlpi, mimal khatciat le Pasian bawlsa nate in ngakin a om uh hi. Hih “ni tawpni” pen Khazih in sihna zo in a thawhkik ni a a kipan ahi hi (Heb 1:2; 1Co 15:26, 55-58). Pasian hehpihna thupha in nate a kipiansak tunglai bangin bawlpha kik ding hi. Humpite in lopa ne ding a, keivom le tuuno omkhawm ding uh hi (Isa 11:6-11). Zeisu in leitung bup thaksuahsak in puahpha ding a, mi gilote khempeuh thukhen ding hi. Ama mite ahih leh, pilna tawh a uk ama khuapi Jerusalem Thak ah paipih ding a, a tawntungin teengsak ding hi (Kil 21). Pasian gelsa bangin mihingte leitung ah kizelin luah ding uh hi.

Hih hun a bei ciangin Khazih in ukna khempeuh a Pa tungah ap ding a, Pasian pen na khempeuh ah na khempeuh hi ding hi (1Co 15:28). Lai Siangtho pen piansakna, pukna le tatkhiatna tangthu ahi hi. Hih tangthute tungtawn in Pasian kipahtawi hi. Pasian in amah na langpanna mawhnate na kisik nading, sihna pan a thokik Khazih na up nading (Rom 4:25) le na nuntakna tawh Pasian na pahtawi nadingin Lai Siangtho tungtawnin nang hong sam hi. (ZSV LST app pan)

Computer software ading in a download nuam te in, 

Nang zat ding software tawh kizui in ki download thei a, 

mmchords.wixsite.com/lamal pan in zong ki en thei in, 

t.me/zomiworship ah zong ki contact thei hi.